Wenn man nachts nich schlapen kann ..........

Wenn man nachts nich schlapen kann ......

Dat is doch 'n verdreihten Kram: Du sittst abends mit de Knütt in de Hand vör dat Kiekschapp, dat Programm is nich grad spannend, un so nah un nah klappen di de Oogen tau. Irgendwann rittst du de Klüsen wedder up un markst, dat de Film woll all to Enn sien möt, denn in de Flimmerkist sünd de Nahrichten to seihn. Eigentlich is man denn väl to mäud, üm in de Koj to gahn. Öwer up den Sessel wiederschlapen - ne dat geiht nich, dat wören de Knaken di woll dull öwelnähmen. Also wrangst du di hoch, schlarpst in dat Bad, üm wenigstens de Ätstuw noch to putzen un geihst denn, schon 'n beten munterer, in de Schlapstuw. Dor steiht öwer nich blot dat Bedd, sonnern ok de Schriewdisch mit den Klappcomputer. Ob dat dor woll wat Nieges gifft? Kann woll nich schaden, wenn du fix noch mal nahsühst. Aha, dor hett sick bi Facebook dien Dochter meld't un 'n Hümpel Lüd hem ehren Semp (se näumen dat "Kommentar") dortau gäben. Dat is mitunner recht interessant un manchmal kann ick mi dat nich verkniepen, mien Meinung to schrieben. Nu büst du putzmunter un dat Nest näben di lockt gor nich miehr so siehr, also warden noch 'n poor Runnen spält. De Klock geiht up Middernacht to, nu möt man woll, ob man will orrer nich, schließlich is de Nacht to'n Schlapen dor. Du krüppst in dat Lager. Wat nu? Man künn ja noch 'n poor Sieden läsen... Dor ward man blot nich miehr väl ut. Wenn di de Baukstaben vör de Oogen verschwemmen daun, ward dat Tied, dat Bauk bisiet to leggen un dat Licht uttaumaken, süs wakst du morgens mit Bauk up'n Buk wedder up un wieldes de Lamp noch an is, kannst du gliek wiederläsen,wenn du Lust hest. Nah vier Stunnen hest du utschlapen un kannst den niegen Dag angahn.
Dat sünd de gauden Nächte, dat gifft öwer ok anner. Dor krüppst du in de Fall, dat Läsen makt di nich schläprig, liekers makst du dat Licht ut un - föngst an to wäuhlen. Von de linke dreihst du di up de rechte Sied, up den Rücken, versöchst dat up den Buk - egal, irgendwat deiht ümmer weih un du kannst maken, wat du wißt, de Schlap will nich kamen. Wat einen denn all dörch den Kopp geiht, dat schriew ick leiwer nich up. Ji weit dat ja seker sülfst.
Wenn dat nich miehr uttauhollen is, steihst du up, geihst mal nah'n Lokus, denn in de Köck un füllst wedder up, wat rut is an Wader. Du kannst ok mal 'n Oogenblick ut dat Stubenfinster kieken, öwer up de Strat is üm de Tied nich väl los. Du löttst dien Kiekers in de Stuw ümherwannern un sühst, verdeubelt noch mal, up den Disch de Pillen liggen, de du abends harrst dalschlucken müßt. Denn brukst du di nich to wunnern, wenn dat mit dat Schlapen nich klappt un du Weihdag hest. Also nimmst du den Deil von dat Rentnerkonfekt, de dorgägen helpen sall. Man künn ok mal kieken, wat dat in de Nacht so in dat Kiekschapp gifft. Na, dat ist ok nich dien Fall un langsam ward di kolt, denn de Heizung is ut un dat Nachthemd höllt nich grad warm. Sicherheitshalber krüppst du in't Bett, dor is dat bald wedder mollig warm. Nu beschäftigst du dienen Brägen mit de Riemels un Gedichte, de du irgentwann eins utwennig liehrt hest. Dat is 'n gaudes Training un kann nich schaden. Wer weit, wo man dat noch mal bruken kann. Irgendwann bliffst du hacken, dat geiht nich wieder un bi de Sök nah den richtigen Riemel up de Festplatt in dienen Denkapparat .......
verdammt noch mal, bün ich doch glatt inschloppen. Utgerekent hüt bimmelt de olle Wecker. Wenn ick dat Schietding doch blot nich anstellt harr!

RiekeXL