Kinnazeit in Kaltnaggisch

Samschdaas wird gebad...odda de "Rohm" vum badewasser...

Somschdaas leht die Mamme zwei Bohle in die Kischemitt, dodruff kummt - vors Baladum ze schone - die groß Wäschbitt.
Die hat ma vorher aus da Wäschkisch eruffer geholl un donn mit warmem Wasser gefillt - gudd halbvoll.
Jetzt war es so weit, es iss losgong un wurd gebad !
"Zeersch kumme die Klääne droon" hat die Mamme gesaht. Unn obwohl es domols geheischd hat:"Dreck macht Speck", scheppt die Mamme noh jeder Tour de "Rohm" vum Badewasser weg.
Donn hat ma in die Bütt heißes Wasser nohgefillt un de Nächschde hups erinn - mach sich ääner e Bild.
Es äldschde vun de Pänz kummt also o, Schluss on die Reih, do war das Wasser in da Wonn schun long nimmeh nei.
Bei 3 oder 4 Kinna, war for das letzschde om Schluß das "BAd uff der Tenn" wahrhafdisch kennmeh Genuß.

Awwer das wasser hat ma aach donn noch nit ausgeschutt, mit "Henko" wurd die Wäsch drinn ingeweischt, dofor wars noch gudd.

Jede un alle Somschdaa war em bade immer e Rieseradau, de Karl hat es Lisbeth gepeetzt, geknubbt un verhau.
Er meescht als Ädschda aach emol ze erschd on die Reih, donn wär for ihne das Badewasser doch aach emol nei.
Awwer es Lisbeth, die klään Krott, krääschd "das gäbbts net" un dofor hats donn vum Larl e Haufe Knubber kritt.
Doch es Liss räscht sich, es is jo, wie ma saht, fix bevors aus da Bitt krawwelt, hat ins Wasser gepinkelt un sisch gefreid:
"So Karl, jetzt haschde 4711 for nix"