[RiekeXL]

Ja, leiw Lüd, wünschen kann man sick väl, öwer siehr selten gahn se in Erfüllung. Klor, dat man sick freut, wenn ganz unverhofft einer erfüllt ward. Väl Spaß bi't Läsen wünscht Rieke!

Ok olle Lüd hem mitunner Glück

Vör ein poor Dag is in uns Ollenplägeheim 'n riesengrotes Paket ankamen. Niegelig wör dat von alle Sieden beögt. Süll dat woll 'n lütten Backaben orrer gor 'ne Mikrowell' sien? Ne, dat geiht nich an, dat is nich erlaubt. Öwer dor backt ja Paketplaster up! Wecke Firma schickt so ehr Produkt af? Wecker sall dat kriegen? Ach, uns Knüttjule is de Empfänger. De olle Uroma, de to Wihnachten ümmer för de Urenkel knütten deiht. Siet twei Johr stahn ja in de Vörwiehnachtstiet unnen in den Ingang Sneiwittchen un de söben Zwerg' in de grote Glasvitrin'! De hett se ut Wullreste makt. Dor hebben Heimbewahners un Besökers giern mal henkecken un sick freut. De Engel ut dat Büro hett de Ollsch dat gewaltige Paket in ehr Zimmer schleppt un dat up den Fautboden afstellt. Komisch, uns Knüttjule wier nich 'n bäten niegelig un dat kem so:
De olle Uroma sitt jeden Dag etwa eine Stunn lang vör ehren lütten Klappcomputer. Siet Johren wier sei all in dat Forum för Senioren aktiv. Dor kann man von ehr in dat Forum för Niedersachsen fast jeden Dag 'n lütten Bidrag läsen. Eigentlich müsst se sick ja bi Meck/Vorpom. rümdrieven, öwer dor wull keiner recht mitmaken un so hett se sick äben wat söcht, wat interessanter för ehr wier un dat wie Niedersachsen. Ümmer blot lütte Bidräg – dat wier ok nich naug, se wull doch ok ehr plattdütschen Vertellers un Riemels unner de Lüd bringen un so hett se sülben dat Plattsnackerforum inricht. Wenn einer dorin läst, mach hei denken: „Na hier is ok nich grad väl los!“ Dat is man blot de Schien nah buten.Von väle Lüd hürt se up Ümwech, dat väle dat geföllt, wat se dor to'n besten giwt, un dormit makt man ehr ok ne Freud.
Dat is noch nich lang her, dunn hett sick 'ne Dam' mit den Nicknamen Tüdeltüg bi ehr meldt. Se schrew, dat se dat giern läst, wat Knüttjule so schrifft un dat se früher ok Handarbeiten makt harr. Se harr in einen Handarbeitsladen arbeit't, de Konkurs makt hett. Dor man de Löhne nich miehr uttahlen künn, hett man ehr statt Geld Wull un sowat gäben. Dorvon wull se uns Knüttjule wat schenken, wenn Jule dat annähmen wör. Jule hett sick freut as so'n Sneikönig. Se kreg ne E-Mail mit Fotos von dat Gorn und hett sick wat rutsöcht. Tüdeltüg hett sick den Karton söcht, de früher as Verpackung för so'n lütten Backaben deint harr, denn den ganzen Kasten vullpackt un nah de Post transportiert.
Bi de Paketverfolgung hett de olle Oma seihn, wo ehr Paket grad wier un wüßt, dat dat an dissen Dag orrer eventuell ok einen Dag later kamen müsste.
Nu stünn dat in ehre Stuw. Dor dat Meddagätentiet wier, künn se dat nich gliek upmaken. Se wier bie't Äten tämlich zappelig. Dornah gew dat nix miehr, wat wichtiger wier, nu künn se dat Paketplaster upsnieden un den Schatz betrachten. Dor harrt ji mal ne glückliche olle Uroma seihn künnt. Näben Wull un anner Handarbeitsgorn wieren noch ein poor öllere Strickzeitungen und Knüttnadeln dorin. In de Gedanken von uns Knüttjule wör öwerleggt, wer wat dorvon kriegen süll – de lütte Urenkelin, de ierst 4 Dag old wier, süll 'n weikes kuschliges Kleed kriegen, Jules Dochter 'ne lange Strickjack un so wieder. Am leiwsten wier se gliek dorbi gahn, öwer se hett wat in Arbeit, wat ierst fardig warden möt. Öwer dornah geiht dat liek los.
Glücklicher kann man ne olle Freu in't Heim nich maken und dat sall jo keiner seggen, dat de Ollen sicck to nix mir to'n freugen kaenen.

Helga Niemann-Gau

[arabella333]

hallo..liebe Rieke ..ich..Kiebitz Arabella hat´s gelesen und ,,oh Wunder alles verstanden,,aber sprechen kann ich´s nicht….aber weisst was??..mein Kopf raucht..ui….war doch anstrengend,,wollte ja alles verstehen—– aber es ist ein sehr netter Beitrag und dafür DANKE…. Kiebitz Arabella

[Grietje]

Moin Rieke,
Oder soll ich Jule sagen. Hast wieder einen tollen Erlebnisbericht geschrieben. Nun hast Du in der nächsten Zeit ja wieder gut zu tun. Zum Schreiben langt es hoffentlich sicher auch noch, denn wir sind doch gespannt, was Du alles zaubern wirst.
Gruß, Grietje

[SFath]

Kiek an Rieke, dat FfS is doch för mannigein Överraschung gaud! 🙂
Ick frei mi mit di, datt du nu düchtig an Knütten blieven kunnst bi disse Utwahl!

[RiekeXL]

Ach, wat hewt ji all schön schrewen! Dat geföllt de olle Rieke öwer gaud. Ick heew soväl to lesen hatt, dat ick dorvon all wedder 'n Verteller schriewen kann. Dat makt doch Spaß. Nu bruk ick man blod noch 'n bäten miehr Tiet ton Knütten un Schriewen, denn is de Welt in Ordnung (fast).
Elise, 'n Köm wier nich dorbi, denn harr eigentlich ick utgäben müsst
Sied all recht hartlich grüßt
von Rieke, alias Knüttjule! 🙂 🙂